Krismas leh Kumthar vuakveta Serchhip Bazar a duty tur Volunteer Group YMA in din

 

Tunhnai khan Serchhip Kawnpui South Branch YMA te chuan Krismas leh Kumthar vuakvet a Serchhip Bazar leh a chhehvel a mitinte thlamuang taka an awm theihnana Duty tur Volunteer Group an din a, inrinni (6th Dec, 2025) tlai dar 3 ah khan S.Kawnpui VC Hall ah Training neiin Excise & Narcotics Deptt. OC Pu R.Lalrinsanga leh Pu Ramthianghlima Advocate ten an hmanpui.
    He hunah hian thu sawiin Excise OC Pu R.Lalrinsanga chuan YMA Volunteer Duty tur te chu theihtawpa an thlawp tur thu a sawi a, Ruihhlo ti leh man kawngah dan in a phut ang te zawm thiam hram hram tura chahin danin a phut ang thlapa man te chu Court hma ah pawh thiamloh chantirna chance a sang bik em em a ni a ti.
    Pu Ramthianghlima Advocate pawhin thu sawiin YMA in an mi man te Jail a rei tak an tan loh fo chhan chu an man dan fuh loh vang te, withness mumal loh vang te a ni thei tih sawiin YMA Duty te chu ruihhlo zuar leh ti thin an man danah fimkhur taka che a, dan in a phut ang te zawm hram hram turin a chah.
    S.Kawnpui South Branch YMA President Pu C.Ramengmawia pawhin thu sawiin Serchhip Bazar area chu hmun hrang hrang atanga mi chihrang hrang, in ang lo tak takin an pankhawm thin a nih avangin Krismas leh Kumthar vuakvetah pawh mitin te thlamuang taka an rawn bazar a, an rawn len vel theihnan YMA in tan lak an tum hle tih a sawi a. Ruihhlo leh a kaihhnawih vanga buaina siam te chu an dim dawn lo tih a sawi.
    Volunteer Group Commander tur Pu R.Lalduhsanga pawhin thu sawiin mipui himna atan Bazar leh a chhehvel area a ruihhlo leh a kaihhnawih vanga buaina siam te chu an hmachhawn chat chat tur thu a sawi a, a tul chuan an dim dawn lo tih a sawi.
    Volunteer Group Training hi Pu Kapliana Pachuau Chairman, Kumpuan Committee in kaihruaiin ruihhlo do na lam hawi Pamphlet leh Video Clip te, Duty te hak tur Vest, Pu Hmingthansiama’n a rawn leisak te an tlangzarh a, zanriah tuihnai tak an kilho nghal bawk.