Revenue Minister Pu B.Lalchhanzova’n Online hmanga chhiah pekna Portal a hawng

 

Vawiin May ni 29, 2026 Fri. khan Land Revenue & Settlement (LR&S) Minister Pu B. Lalchhanzova chuan khan Directorate of Land Revenue & Settlement Conference Room-ah online-a chhiah pekna portal Online Tax Portal Version 2.0 - “landtax.mizoram.gov.in” a hawng. He online portal hi Information and Communication Technology (ICT) Department-te nena tangkawpa siam a ni.

Minister Pu B.Lalchhanzova chuan a hmuna khawn ngai lova mipuite’n mahnia awlsam zawka chhiah an pe thei tawh tur chu lawmawm a tih thu a sawi a, khawvelin chankanna kawngah ke a pen rualin Mizo mipuiten an pen ve zel thei a ni, a ti. Ram hmasawn leh hnam zahawm ni thei turin mipuiten chhiah an pek tam a, an pek that a ngai, a ti a, Mizote chu mahni kea ding thei (self-reliant) ram ni turin LR&S Department chuan hma a la tan a, hetiang technology lama hmasawnna hian India ram puma hmasawnna tehna kawngah pawh dinhmun tha zawkah Mizoram chu a chawikang a, state dangte tih dan en ringawt bik lova state dang te’n min entawn ve theih nan hma lak zel a ni chu lawmawm a tih thu a sawi bawk.

Pu C. Lalrinfela, ICT Department-a Informatics Officer sawidanin Version 1 nena a danglamna lian ber chu Annual Performa hmanga siam vek a ni tawh a, hei hi kum bithliaha mipute tan chhiah pek tur zat felfai taka duanna a ni. He portal hmang hian SMS hmangin chhiah pek hun leh chhiah pe lote thinna tur duan a ni a, Bharat Bill Payment System (BBPS) Service awmna mobile app GPay, PhonePe, BHIM, Amazon Pay leh a dangte hmangin Service list atangin Land Tax leh Zoramchhiah chu Family ID emaw Ration Card No. hmangin a pek theih tawh dawn a ni.

Heng bakah hian thawktu lam tana tangkai tur belh a awm nual bawk a, a langsar zual te chu:

1. Land Tax leh Zoramchhiah te hi Annual Proforma behchhan a nih taka vang hian report leh estimate felfai zawk siam kawngah leh chhiah pe tha leh thalo chhinchiah kawngah thawktute a tichhak thei dawn a ni.

2. Rate leh Chhiah chawi tur zat thlak (revised) anih pawhin harsatna a awm tawh lo.

3. Surveyor leh Manual Fee collection ti thin tan pawh payment record felfai taka chhinchhiahna (Abstract Collection – Online, Manual, Cheque) belh a ni.

4. Chhiah Target leh Revenue Statistics te hmuh mai theihna belh a ni a, tin hard report generate na belh a ni bawk. Heng bakah hian daily collection report en na siam tel a ni.

5. Periodic Patta leh House Pass (Validity neite) hi automatic-in system hian zar dar 12 pelh chiahin a block nghal zel tawh dawn a ni.

6. Land Tax leh Zoramchhiah master record ah hian tihdanglam (change) awm apiang system hian a chhinchiah zel tawh dawn bawk a ni.