*SERCHHIP A RAM PUM HUAP PAVALAI INTAWHKHAWM NEIH TUR PUALIN DC HOVIN KOHHRAN HRANG HRANG, VC, MJA LEH ALL NGO TEN INRAWNKHAWMNA NEI*

 Vawiin(26th Aug.) chawhnu dar 1 khan kumin October  Ni 16-18 chhunga Rampum huap 'Presbyterian Kohhran Pavalai Pawl Intawhkhawm Vawi 7-na neihna tur pualin Serchhip Kawnpui Presbyterian Kohhran Diamon Jubilee Hall ah Serchhip Serchhip Pastor Bial, New Serchhip Pastor Bial leh Vengchung Pastor Bial huamchhunga Kohhran hrang hrang, YMA, MHIP, MUP leh MJA ten inrawnkhawmna an nei a, he hunah hian Presbyterian Kohhran Pavalai Pawl Intawhkhawm Vawi 7-na Organising Committee in an hmalakna tlangpui inhrilhhriatna an nei a, Serchhip DC Pu Paul L.Khuma pawhin he hun hi a hmanpui.

    

He hun hi Presbyterian Kohhran Pavalai Pawl Intawhkhawm Vawi 7-na Organising Vice Chairman Pastor K.Ramdinthara’n a kaihruai a, Pastor Zairemkima’n hunserh hmangin Organising Comtt. Secretary Upa C.Lalthianghlima’n inhmelhiattirna hun a hmang a, Rev. Billy Lalrinchhana’n lawmthusawina hun hmangin Rev. Jonathan Pachuau in kalkhawm malsawmna in a tin a ni.

    He hunah hian Organising Chairman Upa Vanlalchhunga chuan Presbyterian Kohhran Pavalai Pawl Intawhkhawm Vawi 7-na Organising Committee in kil hrang hrang atanga inbuatsaihna an kalpui dan a tarlang a, Organising Committee ah hian Committee Member 28 awmin an hnuaiah hian Sub-Commitee 6 an din a ni. Budget atan hian Rs.nuai 50,10,000/- ruahman a niin Synod Grant atangin Rs.nuai 30 an hmu tawh a, a bak chu Serchhip, Vengchung leh New Serchhip Pastor Bial  ten an tuak dawn a ni.

    Organising Chairman Upa Vanlalchhunga chuan rampum huap intawhkhawmna tur a nih avangin Presbyterian Kohhran chauh lo pawh Kohhran hrang hrang te chu thawhhopuiah an sawm tih a tarlang a, tin, sum chungchangah a hranpa a sorkar hnik an tum loh thu leh Pathian leh a Kohhran te chakna hmachhuana Intawhkhawm hlawhtling tak neih theih ngei an inbeisei thu a sawi a, Khawmpui palai ten thlarau lam hlawkna paw haw ngei se tih hi kan tum ber a ni a, palai ten Serchhip chu khaw fai leh thianghlim angin min hre zui zel se tih kan duh a, chumi tur chuan inbuatsaihna pawh kan kalpui chho tan mek a ni a ti.

    He hunah hian Organising Comtt. Patron, Serchhip DC ni bawk Pu Paul L.Khuma pawhin thu sawiin Pavalai intawhkhawmna tura Kohhran hrang hrang, NGO leh Media mite nen thlenga thawhhona tha - Convergence a awm chu Sorkar tan pawh entawn tlak tak a ni a ti a, mipa mawhphurhna Pathianin a dah pawimawhzia sawiin mipa in kan mawhphurhna kan hlen lohna apiangah chhungkua a buai a, Kohhran leh khawtlang a kal dik hleithei lova, ram rorel pawh a fel thei lova, hmasawn a har thin a ni a ti a, chuvangin Pavalai te hian mawhphurhna sang tak Pathian in kan kova a nghah hi hlen tura kan beih fat fat a ngai a ni a ti.

    Pu Gaston Vanlalhriatpuia DUDO, UD&PA Department, Serchhip pawhin thu sawiin khawmpui palai ten Serchhip hi khaw fai tak kan ni tih an puak haw theuh theihnan theihtawp chhuah tlan kan ngai a ni a ti a. Serchhip hi District Capital fai inelna ah Top 5 na aia hniamah kan la awm ngai lova, Kum 2029 leh 2023 ah te phei chuan District Capital fai ber nihna kan la thei hial a ni tiin tisa leh thlarau lama Pavalai Intawhkhawm a lokal palai ten hlawkna an chhar haw theuh theihnan faina lama tan la theuh turin kalkhawm te a sawm.

  

 Nimin(25th Aug) zing dar 9 khan Serchhip P&E Veng Leisekawt Field ah Pandal sak bul tanna hunserh hman niin Organising Chairman Upa Vanlalchhunga'n tluangtaka pandal sak hna thawh anih theih nan tawngtaiin Pathian hnenah a hlan a. Pandal sak hna hi Mark Events & Entertainment Aizawl Ramhlun ten an thawk dawn a, mihring 10000 chuang leng tura ruahman a ni a, vawiin 26th Aug. zingkar khan Serchhip khaw chhunga Pastor Bial 3 Pavalai Pawl ten hnatlangin Pandal sak hna hi an pui a, Mark Events & Entertainment  te hian chawlhkarkhat chhungin Pandal ruangam hrim hrim hi chu sak zawh hman an tum a ni.